जसे आईला न सांगता बाळाच्या मनाची भाषा समजते आणि तसे नक्कीच शक्य आहे हे आपल्याला माहिती आहेच. प्रेमात ही न-सांगता एकमेकांपासून लांब असून ही मनातले सगळे समजते हे कधीनकधी आपण सर्वानी अनुभवले असेल आणि तसेच काही अनुभव माझ्या वाट्याला ही आलेत, ते आज तुमच्यासमोर मांडणार आहे, शीर्षक तेच “शब्दांविना संवाद” फक्त माणसांबरोबर नव्हे तर प्राणी – पक्षी आणि झाडांबरोबर सुद्धा, जन्मापासून सोबत बाळगत असेलेले पाच इंद्रिय खूप प्रगल्भ आहेत याची प्रचिती मला आली तशी वाचकांना ही येईल.

आपल्याला बऱ्याच वेळेला नकारात्मक भावना, विचार मनातून जाणवतात, कुणाचे आजारपण, कुणाचा अपघात, अचानक घरी येणारे पाहुणे (हा प्रकार आता मोबाईलच्या जमान्यात दुर्मिळ झाला आहे), घरातील सदस्यांना नेमका पदार्थ खावासा वाटणे वैगेरे वैगेरे आणि बहुतेक असे अनुभव बायकांच्या वाट्याला येतात. बायका भावनापूर्ण असतात म्हणून असेलही कदाचित पण लहानपणापासून एक वाक्य प्रयोग घरातील आजी, आई, आत्या, काकू यांच्या तोंडी बरेचदा असे “मला वाटत होते कि आज तुम्ही येणार… किंवा मला वाटत होते कि आज वाईट बातमी मिळणार”!! हे कसे होते त्याची वैज्ञानिक कारणे नक्कीच असतील पण मी त्या वाटण्याच्या मागील कारणे शोधावयास गेलो नाही पण यासारखे अनुभव घेत मोठा झालो. बऱ्याच वेळा काही अघटित घडेलसे वाटत असताना अपराधी वाटत असे. पण त्याला आता मी बालिशपणा म्हणेन कारण मला विचार आला म्हणून काही घडत असेल याची शक्यता शून्य आहे, नाही का? सतत खूप तार्किक पद्धतीने विचार करणे, प्रत्येक गोष्ट तावूनसुलाखून मान्य कारणे, प्रत्येक गोष्टीमागे वैज्ञानिक कारण शोधून समाधान करणे असे आयुष्य जगात असताना एकामागे एक असे अनुभव येत गेले कि तर्कवितर्क करण्यापलीकडे ही काही जग आहे हे समजले, अनुभव मिळाले आणि त्यामागचे कारण न शोधता शांत चित्ताने तो अनुभव जगलो आणि मानसिक दृष्ट्या स्थिर होत गेले जे तर्क वितर्क करत जगात असताना क्वचितक अनुभवले होते.